Sonný Lára í leiknum í dag.
Sonný Lára Þráinsdóttir átti góðan leik á milli stanga Blika sem höfðu betur gegn Val í eiginlegum úrslitaleik um Íslandsmeistaratitilinn í dag.
Lestu um leikinn: Valur 0 - 1 Breiðablik
„Þetta var svaka leikur maður, þetta var eiginlega einn með öllu. Það er búið að tala um þennan leik síðan við töpuðum á móti Selfossi og þetta var mjög gaman. Þetta eru leikir sem maður vill spila," sagði Sonný.
„Við vorum ótrúlega skipulagðar og ekkert að opna okkur. Þær fengu nokkur færi en við fengum líka helling af færum sem við hefðum getað skorað úr. Þetta var bara skemmtilegur leikur."
Sonný telur ótímabært að tala um að Blikar séu með níu fingur á titlinum en liðið á enn eftir að spila þrjá leiki í Pepsi Max-deildinni, með tveggja stiga forystu á Val og leik til góða.
„Nei ég myndi nú ekki segja það, það eru þrír leikir eftir. Það er bara næsti leikur, áfram gakk. Við fögnum í kvöld og byrjum að hugsa um Fylkisleikinn á morgun. Ef maður heldur ekki fókus þá getur allt gerst í fótbolta þannig þetta er bara alls ekki búið."
Athugasemdir
