Spánn: Atletico Madrid tapaði - Barca getur minnkað bilið í eitt stig

Sevilla og Atletico Madrid mættust í stórleik umferðarinnar í La Liga deildinni á Spáni.

Atletico hefur verið að gefa eftir upp á síðkastið en liðið er þó enn á toppi deildarinnar. Sevilla er í fjórða sætinu.

Heimamenn fengu vítaspyrnu á áttundu og var það Lucas Ocampos sem steig á punktinn. Jan Oblak gerði sér hins vegar lítið fyrir og varði spyrnuna.

Staðan var markalaus í hálfleik. Á 70. mínútu kom fyrsta mark leiksins. Hægri bakvörðurinn Jesus Navas átti þá fyrirgjöf á vinstri bakvörðinn, Marcos Acuna, sem stangaði knöttinn glæsilega í netið.

Leikmenn Atletico Madrid voru brjálaðir en þeir vildu fá hendi í aðdragandanum. Þeir höfðu mikið til síns máls en VAR ákvað að gera ekkert í atvikinu.

Correa fékk dauðafæri á 91. mínútu eftir frábæran undirbúning frá Luis Suarez en Bono varði mjög vel í marki heimamanna.

Meira var ekki skorað í þessum leik og því frábær sigur hjá Sevilla staðreynd. Sevilla er nú með 58 stig í fjórða sæti deildarinnar.

Atletico er í efsta sætinu með 66 stig. Ef Barcelona vinnur Real Valladolid á morgun þá er liðið einungis einu stigi frá toppnum. Barcelona og Atletico eiga eftir að mætast innbyrðis.