Hildur Antonsdóttir.
„Við gerðum allt sem við þurftum til að vinna þennan leik. Þetta var ógeðslegur leikur. Það er langt síðan ég hef spilað svona kaotískan leik. Við erum mjög ánægðar að fara af velli með sigur," sagði Hildur Antonsdóttir eftir 0-1 sigur Íslands gegn Úkraínu í undankeppni HM í kvöld.
Lestu um leikinn: Úkraína 0 - 1 Ísland
Hvað gerði þennan leik svona ógeðslegan?
„Þessar nýju reglur, ég held að dómararnir hafi farið alveg vitlaust með þær. Hvorugt liðið var að tefja og alltaf voru þær að tala um fimm sekúndur. Þetta endaði fram og til baka hjá báðum liðum. Boltinn var fram og til baka og dómarinn var ekki með stjórn á leiknum."
FIFA er að innleiða nýjar reglur sem munu meðal annars vera í gildi á HM í sumar. Reglurnar segja meðal annars til um að dómari eigi að telja niður við innkast og markspyrnur og leikmaður sem fær aðhlynningu verður að vera út af í 60 sekúndur. Þessar reglur voru í gildi í leiknum í kvöld og tók dómarinn mjög hart á því.
„Hvorugt liðið var að tefja. Þetta á að vera þegar lið eru að tefja. Hún er að telja fimm sekúndur niður hjá Úkraínu sem eru augljóslega ekki að tefja. Þær eru að reyna að skora. Mér finnst þurfa aðeins betri rammagerð utan um þessar reglur ef fólk á að fá skemmtilegan fótbolta til að horfa á. Það gat ekki verið gaman að horfa á þennan leik," sagði Hildur sem var mikið spörkuð niður í leiknum.
„Þær vou náttúrulega mjög grófar og ég missti hausinn einu sinni, en sem betur fer voru liðsfélagar mínir tilbúnir að róa mig niður. Það er okkar að halda haus. Ég gerði það ekki einu sinni en restin af liðinu gerði það."
Viðtalið er í heild sinni í spilaranum hér að ofan.
