Markvarðavandræðin endalausu hjá Víkingum

Víkingar fengu undanþágu frá KSÍ til að skrá Ögmund í hópinn fyrr á tímabilinu. Á þeim tímapunkti var Aron Snær eini markvörður félagsins sem var leikfær.

Ingvar Jónsson greindist fyrr á tímabilinu með krabbamein og hefur því verið frá keppni. Þá var þriðji markvörður liðsins, Uggi Jóhann Auðunsson, að glíma við brjósklos og var frá.

Uggi Jóhann lék með BF108 í 5. deildinni á síðasta tímabili, en Jochum Magnússon var þá þriðji markvörður meistaraflokksins.

Jochum var lánaður til Völsungs fyrir tímabilið en meiddist í byrjun júlí og hefur ekki spilað síðan.

Alls eru fimm markverðir samningsbundnir Víkingi og hafa þeir allir glímt við meiðsli á tímabilinu.

Ef allt fer í súginn hjá Víkingi og útileikmaður neyðist til að fara í markið hefur miðjumaðurinn Viktor Örlygur Andrason verið nefndur sem besti kandídatinn í það verkefni og er hann sagður liðtækur í markinu.