Manchester United mætir Real Sociedad í Evrópudeildinni í kvöld en þetta gæti orðið fyrsti leikurinn hjá Cristiano í þessari deild.
Hann spilaði hins vegar tvo leiki árið 2002 fyrir Sporting gegn Partizan Belgrade en þá hét keppnin UEFA Cup.
Erik ten Hag var spurður út í Ronaldo eins og svo oft áður, á blaðamannafundi fyrir leikinn en Ronaldo hefur verið að koma inn á sem varamaður í síðustu leikjum.
Hann hefur byrjað einn leik á þessari leiktíð en það var í tapinu stóra gegn Brentford í annari umferð ensku úrvalsdeildarinnar.
„Hann byrjaði inn á gegn Brentford, en ekki síðan. Hann er tilbúinn að byrja leiki, auðvitað getur hann byrjað inn á í flestum leikjum," sagði Hollendingurinn.
United hefur unnið fjóra leiki í röð í ensku úrvalsdeildinni og hefur Ronaldo komið inn á sem varamaður í þeim öllum.