Onana er tvítugur miðjumaður sem skrifar undir fimm ára samning og er fimmti leikmaðurinn sem Everton fær í sumar. Áður höfðu þeir James Tarkowski, Rúben Vinagre, Dwight McNeil og Conor Coady gengið í raðir félagsins.

Onana kom til Lille frá Hamburg síðasta sumar á um sex milljónir punda. Lille er því að hagnast talsvert á sölunni á leikmanninum. Hann er belgískur landsliðsmaður sem byrjaði ellefu leiki með Lille á tímabilinu og kom 21 sinni inn á sem varamaður í Ligue 1 síðasta vetur.

„Amadou er frábær leikmaður sem við vildum mikið fá til Everton. Hann er með marga frábæra eiginleika sem hjálpa við að styrkja okkar miðju og hann hefur mikinn möguleika til að verða enn betur. Ég ræddi við hann um hvers vegna Everton væri rétta félagið fyrir hann. Við erum öll spennt að sjá hann sýna hvað hann getur komið með inn í liðið," sagði Frank Lampard sem er stjóri Everton.

Onana virtist vera á leið til West Ham í sumar en Everton jafnaði tilboð Hamranna og hann ákvað í kjölfarið að velja Everton.