Mjólkurbikar kvenna: Leah Pais skoraði fjögur mörk í sigri Þróttar

Þróttur er síðasta liðið til að tryggja sér sæti í undanúrslitum Mjólkurbikars kvenna eftir sigur á Aftureldingu í Mosfellsbæ í kvöld.

Leah Maryann Pais fór hamförum í liði Þróttar en hún skoraði öll fjögur mörk liðsins. Hennar fyrstu mörk fyrir liðið í sumar.

Það var aðeins eitt mark skorað í fyrri hálfleik en það skoraði Leah úr vítaspyrnu sem hún nældi sjálf í.

Hún bætti öðru markinu við snemma í síðari hálfleik og gerði svo út um leikinn með tveimur mörkum á tveggja mínútna kafla eftir um klukkutíma leik.

Katrín S. Vilhjálmsdóttir kom inn á sem varamaður í liði Aftureldingar og var búin að vera inn á í nokkrar sekúndur þegar hún klóraði í bakkann fyrir Mosfellinga en nær komust þær ekki.