Besta deild kvenna: Ása með þrennu í ótrúlegri endurkomu - Nia skoraði fernu fyrir FH

Íslandsmeistarar Breiðabliks unnu einn ótrúlegasta endurkomusigur ársins er það hafði betur gegn Þrótti, 5-4, á Eikarvellinum í Kópavogi.

Þróttarar voru frábærir í fyrri hálfleik og Bríet Fjóla Bjarnadóttir braut ísinn eftir aðeins níu mínútur. Björg Gunnlaugsdóttir fékk boltann hægra megin og fann Bríeti sem skaut í fyrstu snertingu yfir Herdísi Höllu Guðbjartsdóttur í markinu.

Tíu mínútum síðar bætti Sierra Marie Lelii við öðru marki. Blikar höfðu kallað eftir vítaspyrnu hinum megin en fengu ekkert og Þróttarar brunuðu í sókn. Kayla Rollins kom boltanum á Björg sem fékk nægan tíma og pláss til að senda á fjærstöngina þar sem Lelii kláraði í fyrstu snertingu.

Bríet bætti við glæsilegu marki á 26. mínútu þegar hún lék á varnarmann fyrir utan teig og smellti boltanum í samskeytin. Blikar svöruðu tveimur mínútum síðar þegar Katelyn Duong fann Hrafnhildi Ásu Halldórsdóttur sem sneri laglega, keyrði að marki og skaut að marki. Mollee Swift kom höndum á boltann en náði ekki að halda honum úti.

Þróttarar höfðu þó ekki sagt sitt síðasta fyrir hlé. Kayla kom boltanum á Unni Dóru Bergsdóttir sem skaut að marki. Boltinn fór í hælinn á Lelii, breytti um stefnu og hafnaði í netinu. Annað mark Lelii og Þróttarar fóru með sanngjarna 4-1 forystu inn í hálfleikinn.

Þegar tæpur hálftími var eftir hófst endurkoma Blika. Agla María Albertsdóttir tók hornspyrnu sem Kristín Dís Árnadóttir stangaði í netið og tíu mínútum síðar skoraði varamaðurinn Bryndís Arna Níelsdóttir í sinni fyrstu snertingu. Agla sendi þá aukaspyrnu inn á teiginn þar sem Karitas Tómasdóttir náði snertingu á boltann áður en hann barst til Bryndísar.

Jöfnunarmarkið kom þegar sjö mínútur voru eftir af venjulegum leiktíma. Aftur var Agla á ferðinni með glæsilega sendingu, nú inn fyrir vörnina á Hrafnhildi. Mollee rauk út úr markinu en Hrafnhildur komst framhjá henni og renndi boltanum í autt netið.

Dramatíkinni var ekki lokið því undir lok leiksins fullkomnaði Hrafnhildur þrennuna. Líf Joostsdóttir van Bemmel kom boltanum frá hægri og inn á Hrafnhildi sem skoraði mark sem gæti verið það mikilvægasta í deildinni í ár.

Sigurinn tryggður og Blikar áfram með þriggja stiga forystu á toppi deildarinnar þegar tvær umferðir eru eftir á meðan Þróttarar eru í 4. sæti með 26 og geta nagað sig í handarbökin að hafa glutrað forystunni niður á lokakaflanum.

Yfirburðir hjá FH

FH vann sannfærandi 5-0 sigur á ÍBV í Kaplakrika þar sem Nia Raisa Christopher skoraði þrennu.

Nia kom FH á bragðið með tveimur mörkum á tveimur mínútum snemma leiks. Heimakonur héldu pressunni eftir hornspyrnu og unnu boltann við teiginn áður en hann barst til Niu sem hélt honum vel, sneri sér og skoraði.

Skömmu síðar nýtti hún sér samskiptaleysi í vörn Eyjakvenna og tvöfaldaði forystuna. Helena Maree Errington var með boltann hægra megin í teignum og fann Niu aleina í markteignum þar sem hún skoraði af stuttu færi.

FH hélt áfram að sækja og bætti við þriðja markinu snemma í síðari hálfleik. Ingibjörg Magnúsdóttir fékk gott pláss til að senda inn á teiginn og fann Helenu sem skoraði örugglega.

Nia hafði lengi leitað að þriðja markinu þegar hún fullkomnaði loks þrennuna. FH vann boltann hátt á vellinum og Helena hafði úr nokkrum kostum að velja en þræddi sendingu á Niu sem kláraði framhjá Guðnýju Geirsdóttur. Þriðja stoðsending Helenu og þriðja mark Niu.

Nia var ekki hætt því í uppbótartíma bætti hún við fimmta markinu og enn var það Helena að leggja það upp en hún skallaði hornspyrnu fyrir fætur Niu sem setti boltann í netið af stuttu færi.

Mikilvægt mark upp á markatöluna og fimm marka sigur FH staðreynd.

FH er áfram í öðru sæti þremur stigum á eftir Blikum.

Í næstu umferð mun FH mæta Þrótti á meðan Blikar spila við Stjörnuna. Það er því enn góður möguleiki á að það verði hreinn úrslitaleikur í lokaumferðinni þegar Breiðablik tekur á móti FH.

Breiðablik 5 - 4 Þróttur R.
0-1 Bríet Fjóla Bjarnadóttir ('9 )
0-2 Sierra Marie Lelii ('19 )
0-3 Bríet Fjóla Bjarnadóttir ('26 )
1-3 Hrafnhildur Ása Halldórsdóttir ('28 )
1-4 Sierra Marie Lelii ('42 )
2-4 Kristín Dís Árnadóttir ('63 )
3-4 Bryndís Arna Níelsdóttir ('73 )
4-4 Hrafnhildur Ása Halldórsdóttir ('83 )
5-4 Hrafnhildur Ása Halldórsdóttir ('90 )
Lestu um leikinn

FH 5 - 0 ÍBV
1-0 Nia Raisa Christopher ('5 )
2-0 Nia Raisa Christopher ('7 )
3-0 Helena Maree Errington ('47 )
4-0 Nia Raisa Christopher ('59 )
5-0 Nia Raisa Christopher ('92 )
Rautt spjald: Jón Ólafur Daníelsson , ÍBV ('71) Lestu um leikinn