Elías hélt hreinu í sex marka sigri á Cardiff

Undirbúningstímabilið er í fullum gangi hjá íslensku atvinnumönnunum okkar og margir að nýta tækifærin.

Elías Rafn Ólafsson er aðalmarkvörður Midtjylland, sem vann nokkuð óvæntan stórsigur á Cardiff. Velska liðið komst aftur upp í ensku B-deildina á síðustu leiktíð.

Rúnar Alex Rúnarsson stóð á milli stanganna hjá FCK, sem marði 3-2 sigur á Horsens.

Davíð Kristján Ólafsson var í liði Polonia Warszawa sem tapaði 2-1 fyrir Motor Lublin, á meðan Gísli Gottskálk Þórðarson og félagar hans í Lech Poznan unnu 4-0 sigur á Bohemians frá Tékklandi.

Hólmbert Aron Friðjónsson kom inn af bekknum hjá Gwangju, sem tapaði 3-0 fyrir Pohang í suður-kóresku úrvalsdeildinni. Gwangju er á botninum með aðeins átta stig eftir sautján umferðir.

Stefán Ingi Sigurðarson og Alfons Sampsted spiluðu sitt hvorn hálfleikinn í 3-0 tapi Go Ahead Eagles gegn Apollon Limassol frá Kýpur.

Brynjólfur Andersen Willumsson kom inn á sem varamaður á 60. mínútu í 3-2 sigri Groningen á Emmen og Breki Baldursson var í liði Esbjerg sem tapaði 2-0 fyrir portúgalska liðinu Mafra.

Kjartan Már Kjartansson kom inn af bekknum hjá Aberdeen, sem vann 2-0 sigur á Linfield.

Jón Dagur Þorsteinsson byrjaði hjá Herthu Berlín, sem vann 3-1 sigur á Lokomotive Leipzig.