Sterkastur í 20. umferð - Aldrei notið þess meira að spila fótbolta

Aron Sigurðarson varð annar leikmaðurinn til að skora 20 mörk í sögu efstu deildar karla í fótbolta þegar hann skoraði þrennu í sigri KR gegn KA á Akureyri, 5-3. Aron er leikmaður 20. umferðar.

Eins og kom fram í samantekt Víðis Sigurðssonar er hann nú aðeins einu marki frá því að jafna og tveimur frá því að slá markamet KR-ingsins Benonýs Breka Andréssonar sem skoraði 21 mark fyrir KR í deildinni árið 2024. Hann hefur sjö leiki til að ná því takmarki. Þá er Aron fyrstur til að skora 20 mörk í 22 leikjum en gamla markametið, 19 mörk, var sett í 18 og síðan 22 leikjum.

Aron skoraði sína fyrstu þrennu á ferlinum í Bestu deildinni og er fyrstur KR-inga til að ná því síðan áðurnefndur Benoný Breki skoraði þrennu, fernu og fimmu fyrir KR á metárinu 2024. Þá er Aron fyrstur í deildinni í fimmtán ár til að vera kominn með þrennu eftir 28 mínútna leik en Guðjón Baldvinsson, einnig KR-ingur, gerði nákvæmlega það sama í 3-0 sigri á Fylki árið 2011.