Spænski miðjumaðurinn Rodrigo sleit krossband í 2-2 jafntefli Manchester City gegn Arsenal í september og búist var við að hann yrði frá út tímabilið, eins og er yfirleitt tilfellið með krossbandsslit.
Rodri segist þó vera að ná góðum árangri í endurhæfingunni og hefur sett sér ansi bjartsýnt markmið að snúa aftur til leiks fyrir lok tímabilsins.
Rodri vann Ballon d'Or kosninguna í haust og er af mörgum talinn vera allra besti miðjumaður heimsfótboltans í dag. Man City saknar hans sárt og hefur tapað síðustu fjórum leikjum sínum í röð.
„Mér líður eins og ég geti snúið til baka á þessu tímabili. Það er mögulegt og ég ætla að láta það gerast. Ég er að passa mig að fara mjög varlega í endurhæfingarferlinu, ég er ekki að flýta mér," sagði Rodri, sem benti einnig á að tímabilið í ár verður lengra heldur en leiktíðirnar sem komu á undan.
„Þetta er langt tímabil sérstaklega með HM félagsliða næsta sumar. Ég get náð þessu."
Rodri er 28 ára gamall og vonast til að vera orðinn aftur liðtækur um miðjan júní í síðasta lagi, tæpum 9 mánuðum eftir krossbandsslitið.
Rodri var svo spurður út í Ballon d'Or verðlaunin sem hann vann. Þar endaði Vinicius Junior í öðru sæti, Jude Bellingham í þriðja sæti, Dani Carvajal í því fjórða og Erling Braut Haaland í fimmta.
„Ég myndi velja Dani Carvajal í annað sætið og Vinicius Junior í þriðja sætið."
Rodri og Carvajal sigruðu Evrópumótið með spænska landsliðinu síðasta sumar en hann og Vinicius hafa aldrei verið liðsfélagar.
Athugasemdir
