Fernandes hafnar öðru samningstilboði United

Viðræður um nýjan samning hafa staðið yfir síðan í sumar, en Fernandes hafnaði fyrsta samningstilboði félagsins á þeim tíma.

United hefur síðan unnið hörðum höndum að því að leggja fram endurbætt tilboð, sem leit dagsins ljós á dögunum. Samkvæmt Athletic hafnaði Fernandes því einnig.

Viðræðurnar snúast einkum um laun og lengd samningsins, en núgildandi samningur Portúgalans rennur út eftir tímabilið og getur hann því hafið viðræður við félög utan Englands í byrjun næsta árs.

Í samningi Fernandes er þó ákvæði sem heimilar United að framlengja hann um eitt ár til viðbótar og þykir líklegast að félagið muni nýta sér þann möguleika.

Fernandes var valinn besti leikmaður ársins af bæði blaðamönnum og leikmönnum ensku úrvalsdeildarinnar í vor, eftir að hafa lagt upp 21 mark og borið liðið á herðum sér á leið þess í Meistaradeildina.

Hann hefur hins vegar verið skugginn af sjálfum sér á þessari leiktíð og gagnrýndi meðal annars Michael Carrick og þjálfarateymi hans eftir 4-1 tapið gegn Como í Meistaradeildinni.

Fernandes, sem er 32 ára, er sagður íhuga framtíð sína hjá félaginu, en það er ekki í fyrsta sinn sem hann veltir fyrir sér að yfirgefa United. Al Hilal sýndi honum áhuga á síðasta ári og Galatasaray var tilbúið að bjóða honum 20 milljónir evra í árslaun í ágúst á þessu ári. Ekkert varð þó úr félagaskiptum í hvorugt skiptið.