Hákon Haralds orðaður við Newcastle út af einkaflugi

Á samfélagsmiðlinum X er landsliðsmaðurinn Hákon Arnar Haraldsson orðaður við enska úrvalsdeildarfélagið Newcastle. Það kemur til vegna einkaflugs frá Reykjavík til Newcastle í dag sem stuðningsmaður reiknaði út að gæti verið út af mögulegum félagaskiptum og hugsaði að Hákon, sem hefur áður hefur verið bendlaður við Newcastle, gæti verið í flugvélinni. Fjölmargar einkaflugvélar voru á Íslandi í gær í tengslum við almyrkvann.

Hákon er leikmaður Lille í Frakklandi sem verður í Meistaradeildinni í vetur og ekki eru taldar miklar líkur á því að hann færi sig um set fyrir gluggalok.

Newcastle er í leikmannaleit eftir að hafa misst öfluga leikmenn í sumar og takmarkað hefur gengið á markaðnum til þessa. Hákon hefur áður verið orðaður við Newcastle því í janúar í fyrra var sagt frá því að njósnarar Manchester United og Newcastle hefðu verið að fylgjast með honum og var hann þá einnig orðaður við Tottenham.

Í dag hefur hann einnig verið nefndur í tengslum við stórliðið Galatasaray í Tyrklandi. Í færslu á X segir að Galatasaray sé að fá nýjan mann til að spila í 'tíunni' og talið að það sé Hákon. Samkvæmt heimildum Fótbolti.net hefur engin fyrirspurn borist frá félögunum í Hákon á þessum tímapunkti.