AC Milan er búið að staðfesta félagaskipti Luka Modric til félagsins. Þessi króatíska goðsögn gerir eins árs samning við ítalska stórveldið, með möguleika á eins árs framlengingu.
Modric, sem verður fertugur í september, hefur unnið allar helstu félagsliðakeppnir á ferli sínum sem atvinnumaður í fótbolta. Hann var hjá Real Madrid í rúman áratug og sankaði að sér titlum þar eftir nokkur titlalaus ár í herbúðum Tottenham Hotspur.
Modric er ótrúlegur fótboltamaður þar sem hann getur enn leikið á hæsta gæðastigi þrátt fyrir háan aldur. Til samanburðar eru Lionel Messi og Cristiano Ronaldo báðir löngu farnir úr evrópska boltanum, en Modric tórir enn og getur sinnt mikilvægu hlutverki.
Hann kom að 13 mörkum í 57 leikjum með Real Madrid á nýliðnu tímabili, auk þess að taka þátt í öllum sex leikjum liðsins á HM félagsliða. Þar að auki er hann ennþá algjör lykilmaður í sterku landsliði Króatíu, sem endaði í öðru sæti Þjóðadeildarinnar 2023 eftir að hafa náð í bronsverðlaun á HM 2022 og silfur á HM 2018.
Milan leikur ekki í Evrópu í ár eftir að hafa endað í áttunda sæti ítölsku deildarinnar á síðustu leiktíð, tveimur stigum frá sæti í Sambandsdeildinni.
Hann er annar leikmaðurinn sem gengur til liðs við Milan í sumar eftir Samuele Ricci. Báðir leika þeir sem miðjumenn og eiga að fylla í skarðið fyrir Tijjani Reijnders sem var seldur til Manchester City.
Milan er einnig í leit að bakverði til að fylla í skarðið fyrir Theo Hernández sem er farinn til Al-Hilal.
Legend. ????#WelcomeModri? pic.twitter.com/U5lhhoACXX
— AC Milan (@acmilan) July 14, 2025
Athugasemdir
