Juve ætlar að krækja í Felipe Anderson og Bonaventura í sumar

Annar þeirra er brasilíski kantmaðurinn Felipe Anderson, sem á 31 árs afmæli í dag.

Anderson er mikilvægur hlekkur í liði Lazio og hefur komið að 12 mörkum í 44 leikjum það sem af er tímabils, en hann hefur einnig leikið fyrir West Ham United, Porto og Santos á ferlinum.

Anderson, sem á ekki nema tvo A-landsleiki að baki fyrir Brasilíu, hefur í heildina spilað yfir 300 keppnisleiki á sjö og hálfu ári hjá Lazio.

Hinn er Giacomo Bonaventura, ítalskur miðjumaður sem verður 35 ára gamall í ágúst en er ennþá í frábæru standi og spilar mikilvægt hlutverk í liði Fiorentina.

Bonaventura hefur komið að 11 mörkum í 37 leikjum á tímabilinu en hann á í heildina 156 leiki að baki á fjórum árum hjá félaginu.

Bonaventura á 18 A-landsleiki að baki fyrir Ítalíu en hann lék fyrir Atalanta og Milan áður en hann gekk í raðir Fiorentina.

Talið er afar líklegt að Anderson gangi til liðs við Juve í sumar, en óljóst er hvort Bonaventura sé reiðubúinn til að yfirgefa Flórens.