„Við byrjuðum leikinn ágætlega, en eins og oft í sumar réttum við leikinn upp í hendurnar á Fram. Við gáfum boltann á slæmum stað og fengum á okkur mark og eftir það var bara eitt lið á vellinum í fyrri hálfleik og það var Fram. Varnarlega vorum við allt of langt frá mönnunum okkar, töpuðum öllum 50/50 einvígum og 1 á 1 einvígum. Við vorum heppnir að sleppa með 1-0 inn í hálfleikinn," sagði Heimir Guðjónsson, þjálfari FH, eftir 2-0 tap gegn Fram á Lambhagavellinum í kvöld.
Lestu um leikinn: Fram 2 - 0 FH
„Það er alltaf áhyggjuefni að við skorum ekki en aðaláhyggjuefnið er það að við erum búnir að spila sjö útileiki og sex af þeim á gervigrasi og búnir að tapa þeim öllum. Ég held örugglega öllum bara tiltölulega sannfærandi og þá fer þetta að verða eins og umræðan var 2022, þar sem að FH-liðið gat ekki spilað á gervigrasi, af því að við erum á grasi," sagði Heimir beittur.
Vuk Oskar Dimitrijevic skoraði í kvöld gegn sínum gömlu félögum í FH og er kominn með sex mörk í ellefu leikjum.
„Nei alls ekki. Ég er bara ánægður að Vuk gangi vel," sagði Heimir að lokum aðspurður hvort hann saknaði Vuk.
