Sambandsdeildin: Breiðablik gekk frá einvíginu á heimavelli

Breiðablik verður með í næstu umferð Sambandsdeildarinnar eftir sigur Racing Union á heimavelli í kvöld.

Fyrri leikur liðanna endaði með 2-3 sigri Blika. Þeir lentu 2-0 undir en sýndu mikinn karakter og komu til baka.

Í kvöld var Breiðablik sterkari aðilinn. „Blikar hafa verið betri í fyrri hálfleik en eins og hefur sýnt sig þá er ofboðslega stutt á milli í þessu," skrifaði Sæbjörn Þór Steinke í beinni textalýsingu þegar flautað var til hálfleiks.

Staðan var markalaus í hálfleik en eftir fimm mínútur í seinni hálfleik, þá kom fyrsta mark leiksins. Jason Daði Svanþórsson mætti á fjærstöngina eftir fyrirgjöf frá Davíð Ingvarssyni og staðan 1-0 fyrir Blika.

Breiðablik var þá komið í tveggja marka forystu og ekki varð verkefnið auðveldara fyrir gestina þegar Dwayn Holter fékk að líta rautt spjald. Hann tók Árna Vilhjálmsson niður sem aftasti maður og rauða spjaldið fór á loft.

Árni þakkaði svo fyrir sig með að ganga frá einvíginu. „Virkilega vel útfærð skyndisókn. Viktor Karl leggur boltann út til vinstri á Árna sem á nokkrar snertingar áður en hann klárar með skoti í hægra hornið. Vel gert!" skrifaði Sæbjörn þegar Árni skoraði á 74. mínútu leiksins.

Lokatölur 2-0 fyrir Blika og lokaniðurstaðan 5-2 í þessu einvígi samanlagt. Breiðablik mætir Austria Vín í næstu umferð Sambandsdeildarinnar.