Ætla ekki að skipta um skoðun varðandi Casemiro

Sir Jim Ratcliffe hefur unnið að því að draga niður kostnað og það er talið hafa verið bak við þá ákvörðun að nýta ekki ákvæði um að framlengja við Casemiro. United vildi taka ákvörðun snemma ti lað geta unnið að því að endurnýja leikmannahópinn.

Casemiro bað um að fréttirnar yrðu gerðar opinberar til að forðast vangaveltur og misskilning. Síðan hefur hann farið á kostum og er kominn með sjö mörk á tímabilinu; sex af þeim hafa verið skallamörk.

Hann skoraði fyrsta mark leiksins í sigrinum gegn Aston Villa á sunnudaginn og fagnaði fyrir framan Stretford End stúkuna, þar sem heitustu stuðningsmenn United halda sig, og benti í sífellu á merkið á treyjunni.

Stuðningsmenn sungu „Eitt ár í viðbót, Casemiro“ eftir leikinn. Bruno Fernanders fyrirliði talaði um það í viðtali að hann vonaðist eftir því að Casemiro yrði áfram.

BBC segir þó engar áætlanir hjá Manchester United um að endurskoða ákvörðunina og Michael Carrick hefur líka sagt að það verði ekki skipt um skoðun.

„Þegar það er búið að ákveða eitthvað þá gerir það allt aðeins auðveldara og allir skilja stöðuna. Hann hefur haft frábær áhrif," segir Carrick.