Lárus Orri spjaldaður.
Fundur Jóhanns Inga, dómara, við fyrirliðana tvo í hálfleik.
Ósáttur með vítadóminn.
ÍA laut í lægra haldi gegn Breiðabliki í Bestu deildinni fyrr í kvöld. Leikar enduðu 1-0 fyrir Kópavogsliðinu. Mikill hiti var í boðvanginum í leiknum og fengu aðstoðarþjálfarar beggja liða reisupassann. Þá fengu aðalþjálfararnir báðir að líta gula spjaldið.
Lárus Orri Sigurðsson, þjálfari ÍA, ræddi við Fótbolta.net að leik loknum.
Lárus Orri Sigurðsson, þjálfari ÍA, ræddi við Fótbolta.net að leik loknum.
Lestu um leikinn: Breiðablik 1 - 0 ÍA
Risastór mistök
„Ég er hundfúll með þriðja liðið í þessum leik. Í fyrsta lagi á þetta ekki að vera víti, boltinn fer í líkama Viktors og upp í hendina á honum en hann dæmir víti á það. En þá verður hann að dæma víti í seinni hálfleik þegar boltinn er á leiðinni í netið og fer í hendina á Höskuldi.
Þetta eru risastór mistök og fyrir utan þau að þá var leikstjórnunin alls ekki nægilega góð. Allt of mikil dramatík og of mikil læti. Auðvitað er ástríða í mönnum; Hjá þjálfarateyminu og leikmönnum.“
Twana ekki nægilega góður
„Það er gert alltof mikið úr þessu. Einhverjir fundir í hálfleik með fyrirliðum og þjálfurum. Hann Twana (Khalid Ahmed) fjórði dómari er bara alls ekki nægilega góður í þessu. Við höfum verið með hann áður.
Að Deano og Jón Guðni er algjör skandall. Þeir eru að rífast og að láta hvorn annan heyra það, það var ekkert annað að gerast. Hann (Twana) klagar í dómarann og hann gefur þeim rautt spjald. Bara algjört bull, það á að segja þeim að slaka á og áfram gakk.
Ég er tiltölulega svekktur með að fara ekki með neitt héðan en viðbrögðin í seinni hálfleik voru góð. Lélegasta liðið á vellinum var þriðja liðið.“
Valgeir skilur ekki norðlensku
Það ætlaði allt um koll að keyra undir lok fyrri hálfleiks. Valgeir Valgeirsson og Lárus Orri létu einhver orð falla við hvorn annan og Valgeir sakaði Lárus um að kalla sig tussu. Við það skarst Ólafur Ingi Skúlason, þjálfari Blika, inn í leikinn og lét Lárus heyra það.
Báðir þjálfarar fengu gult spjald að launum, sem og Rúnar Már Sigurjónsson, sem er meiddur, og er í liðsstjórn ÍA.
„Það var einhver dramatík í gangi þar. Einhver Valgeir kemur upp að mér og sakar mig um að kalla sig ljótum orðum. Þetta er strákur sem er alinn hér upp í Kópavogi og skilur norðlenskuna nægilega vel. Ég veit ekki hvað einhver fimmtugur kall ætti að kalla einhvern leikmann þessum orðum sem hann segir að ég hafi gert. En ég lét hann heyra það á norðlensku.“
Viðtalið má sjá í heild sinni í spilaranum hér að ofan.
