André Römer í KA (Staðfest)

Danski miðjumaðurinn André Römer er genginn í raðir KA en hann kemur á frjálsri sölu frá danska úrvalsdeildarliðinu Randers þar sem samningur hans rann út í sumar.

Ef marka má umfjöllun danska miðilsins Tipsbladet í gær skrifar Römer undir samning sem gildir út næsta tímabil.

Römer, sem verður 33 ára á morgun, er varnarsinnaður miðjumaður sem hefur þrívegis á sínum ferli orðið danskur meistari og einu sinni bikarmeistari. Hann á að baki tæplega 300 leiki í dönsku úrvalsdeildinni, tæplega 70 leiki í sænsku úrvalsdeildinni og rúmlega 30 Evrópuleiki á sínum ferli.