„Gerum lítið annað en að hrekja besta mann deildarinnar úr landi"

Hann var líka harðorður í garð Ívars Orra Kristjánssonar, dómara, leiksins og dómarastéttarinnar í heild sinni. Hann sagði dómara ekki verja besta leikmann deildarinnar.

„Brynjólfur Andersen var langbesti maðurinn á vellinum og það er kominn tími á að dómarastéttin fari að vernda hann," sagði Óskar Hrafn í viðtali við Runólf Trausta á Stöð 2 Sport strax eftir leikinn.

„Það er dæmt í hvert skipti sem hann snertir mann en hann fær ekkert hjá einum né neinum."

„Með þessu áframhaldi gerum við lítið annað en að hrekja besta leikmanninn í deildinni úr landi," sagði Óskar sem vill að dómarastéttin sýni sanngirni.

Brynjólfur, sem er fæddur árið 2000, hefur leikið sjö leiki í Pepsi Max-deildinni í sumar en bíður enn eftir fyrsta markinu. Hann fékk gult spjald í leiknum í kvöld og var að mati Kristófers Jónssonar, fréttaritara Fótbolta.net, heppinn að fá ekki rauða spjaldið.

„Nei nú er ég alveg hættur að skilja. Enn eina ferðina brýtur Brynjólfur klaufalega. En Ívar ætlar ekki að spjalda hann aftur. Þetta er rugl," skrifaði Kristófer í beinni textalýsingu þegar Brynjólfur braut af sér á 80. mínútu. Úr aukaspyrnunni í kjölfarið kom sigurmark Vals.