Milan Tomic í sitt þriðja leikbann í sumar

Þrír leikmenn verða í banni í næstsíðustu umferð Bestu deildarinnar sem spiluð verður næstu helgi.

Benedikt Warén fékk beint rautt spjald þegar Stjarnan tók á móti KA á Samsungvellinum. Benedikt sparkaði í Valdimar Loga Sævarsson og fékk rautt spjald fyrir. Benedikt verður í banni þegar Stjarnan heimsækir Þór næsta laugardag.

Eyjamennirnir Milan Tomic og Eiður Atli Rúnarsson eru þá komnir í bann fyrir uppsöfnuð gul spjöld. Tomic er á leið í sitt þriðja bann í sumar en hann er kominn með tíu gul spjöld. Eiður Atli var að fá sitt fimmta gula spjald, annað spjaldið eftir tvískiptingu.

Jón Gísli Eyland Gíslason, leikmaður ÍA, hefur líkt og Tomic fengið tíu spjöld í sumar og eru þeir tveir efstir þegar kemur að gulum spjöldum á tímabilinu.

Aron Baldvin Þórðarson, aðstoðarþjálfari Víkings, tekur þá út seinni leikinn í sínu tveggja leikja banni þegar Víkingur heimsækir Breiðablik.