Tveir leikmenn Arsenal meiddust eftir leik

Piero Hincapie og Martin Zubimendi verða ekki með Arsenal í leiknum gegn Lille í Meistaradeildinni á morgun. Þeir meiddust báðir á ökkla eftir sigurleikinn gegn Leeds á laugardaginn.

Þetta er ótrúleg óheppni en leikmenn voru að skokka sig niður og tóku létta æfingu eftir leik.

„Við vorum með skipulagða æfingu og það urðu tvö óheppileg atvik og við misstum tvo leikmenn. Þeir eru að fara í frekari skoðun," sagði Mikel Arteta á fréttamannafundi í dag.

„Ég hef aldrei áður lent í þessu á mínum sjö árum sem stjóri Arsenal. Eina leiðin til að koma í veg fyrir að svona geti gerst er að hætta að æfa. Ef ég ætti spádómskúlu hefði ég sagt þeim að fara bara í pottinn og slaka á."

Arteta segir að það skýrist betur á morgun hversu lengi þeir verða frá en að meiðsli ekvadorska varnarmannsins Hincapie líti út fyrir að vera verri en hjá Spánverjanum.