Spánn: Valencia vann í Sevilla

Spænsku vonbrigðaliðin Sevilla og Valencia áttust við í lokaleik dagsins í efstu deild og höfðu lærlingar Carlos Corberán betur.

Valencia var sterkara liðið í fyrri hálfleik og skoruðu Hugo Duro og Largie Ramazani mörkin. Duro skoraði fyrst eftir hrikalegan vandræðagang í varnarlínu Sevilla.

Fyrst áttu heimamenn misheppnað innkast sem leiddi til snöggrar sóknar, en þeir unnu boltann til baka aðeins til að missa hann strax aftur með einstaklega klaufalegu spili rétt fyrir utan eigin vítateig. Boltinn barst til Duro sem gaf laglega hælsendingu á Largie Ramazani, en Odysseas Vlachodimos gerði mjög vel að verja góða skottilraun frá Ramazani. Boltinn fór þó ekki langt því Duro var mættur til að fylgja eftir með skalla og taka forystuna.

Dómarinn bætti sex mínútum við fyrri hálfleikinn og tvöfaldaði Ramazani forystuna undir lokin eftir misheppnaða pressu hjá Sevilla. Ramazani skoraði af stuttu færi eftir frábæran undirbúning frá Luis Rioja.

Sevilla var mikið með boltann í síðari hálfleik og átti tíu marktilraunir án þess að skapa þó mikla hættu gegn sterkri vörn Valencia.

Lokatölur 0-2 og er Valencia sjö stigum fyrir ofan fallsvæðið eftir þrjá sigra í síðustu fjórum deildarleikjum.

Sevilla er aðeins þremur stigum fyrir ofan fallsæti.