Þýskaland: Auðvelt fyrir Leipzig á útivelli

RB Leipzig er komið aftur á sigurbrautina eftir að hafa gert jafntefli við FC Bayern í síðustu umferð.

Í dag heimsótti liðið Werder Bremen og leiddi 0-2 í leikhlé. Willi Orban skoraði með skalla eftir hornspyrnu og svo skoraði Marcel Sabitzer beint úr aukaspyrnu.

Í síðari hálfleik fékk Konrad Laimer seinna gula spjaldið sitt sem er afar umdeilt. Hann snerti knöttinn óvart með hendinni á miðjum velli, ekki margir sem hefðu gefið seinna gula fyrir svo lítið brot.

Það virtist þó ekki há gestunum að vera manni færri. Ef eitthvað þá spiluðu þeir betur og innsiglaði Marcelo Saracchi sigurinn á lokamínútunum, með marki eftir skyndisókn.