Aron Snær og Siggi Lár búnir að framlengja við Þrótt (Staðfest)

Stuðningsmenn Þróttar geta haldið áfram að gleðjast en lykilmennirnir Aron Snær Ingason og Sigurður Egill Lárusson hafa framlengt samninga sína við félagið.

Þróttur tryggði sér sæti í Bestu deildinni með því að vinna Fylki verðskuldað 1-0 í úrslitaleik umspils Lengjudeildarinnar síðasta laugardag.

Aron og Sigurður voru báðir í liði ársins í deildinni en sá síðarnefndi var valinn leikmaður tímabilsins af Fótbolta.net.

„Þetta var aldrei spurning," er haft eftir Sigurvin Ólafssyni þjálfara Þróttar á samfélagsmiðlum félagsins.

Aron Snær er 24 ára sóknarleikmaður sem var sterklega orðaður við Val en ákvað að taka slaginn áfram með Þrótti. Hann átti frábært tímabil og skoraði sigurmarkið gegn Fylki.

„Hann á það svo sannarlega skilið. Ég vona bara að hann verði áfram hjá okkur í Þrótti. Mér finnst það alveg galið eiginlega ef hann fer eitthvað annað. Hann á að vera aðalmaðurinn hjá okkur næsta sumar, mér finnst það ekki spurning. Ég skil það samt vel að það sé verið að bera víurnar í hann," sagði Sigurður Egill um Aron Snæ í viðtali við Fótbolta.net í vikunni.

Sigurður Egill er 34 ára og lék sem vængbakvörður hjá Þrótti í sumar eftir að hafa komið frá Val. Þessi reynslumikli sigurvegari á stóran þátt í því að liðið náði markmiði sínu.