Bjarni Ólafur Eiríksson til Vals (Staðfest)

Hann gerir fjögurra og hálfs árs samning við Valsmenn sem gildir út tímabilið 2011 en getur þó ekki leikið með liðinu strax því hann er með álagsbrot á rist og verður því frá keppni í fjórar til sex vikur. Líklegt er því að hann verði tilbúinn í 11. umferð Landsbankadeildarinar er Valur mætir Fylki.

Bjarni Ólafur lék síðast með Val sumarið 2005 og vakti mikla athygli fyrir frammistöðu sína og var það árið valinn í íslenska landsliðið og lék með því tvo landsleiki.

Að tímabilinu loknu fór hann til reynsluæfinga hjá liðum á Norðurlöndunum eins og Midtjylland, Silkeborg, Valerenga og Odd Grenland og í janúar 2006 gekk hann í raðir Silkeborg í Danmörku.

Liðið féll hinsvegar úr dönsku úrvalsdeildinni nú í maí og því vildi hann söðla um og ákvað að lokum að snúa aftur heim og leika með Val eftir að hafa leikið 32 leiki með liðinu.

Hann á að baki 53 leiki í efstu deild hér á landi og hefur skorað í þeim eitt mark sem hann skoraði í fyrstu umferðinni gegn Grindavík árið 2005.

Hann lék alla 18 leiki Vals í Landsbankadeildinni það sumar og alla fimm bikarleikina er Valur varð bikarmeistari þetta ár. Í lok ársins var hann svo valinn íþróttamaður Vals 2005.