Spánn: Sávio innsiglaði sigurinn með tvennu í uppbótartíma

Girona, sem er spútnik lið spænska deildartímabilsins, tók á móti Rayo Vallecano í eina leik kvöldsins og var staðan markalaus eftir afar bragðdaufan fyrri hálfleik.

Heimamenn í Girona skiptu um gír í seinni hálfleik og voru talsvert sterkari aðilinn. Það tók Viktor Tsygankov aðeins nokkrar mínútur að taka forystuna fyrir Girona eftir leikhlé.

Girona sýndi yfirburði og fékk færi til að tvöfalda forystuna en gestirnir fengu einnig færi til að jafna, en boltinn rataði ekki í netið fyrr en í uppbótartíma.

Brasilíska ungstirnið Sávio, sem er talinn vera á leið til Englandsmeistara Manchester City, lét þá til sín taka og skoraði tvennu til að innsigla sigurinn.

Lokatölur 3-0 fyrir Girona sem er í öðru sæti, sex stigum á eftir Real Madrid þegar tólf umferðir eru eftir af deildartímabilinu. Þetta var mikilvægur sigur fyrir Girona eftir tvo tapleiki og eitt jafntefli í síðustu þremur.

Vallecano situr eftir í neðri hlutanum, með 25 stig eftir 26 umferðir en þó heilum sjö stigum fyrir ofan fallsæti.