Mykhailo Mudryk, leikmaður Chelsea, heillaði ekki Steven Gerrard í landsleik Englands og Úkraínu í undankeppni Evrópumótsins á Wembley í gær.
Mudryk, sem var keyptur fyrir tæpar 100 milljónir punda frá Shakhtar í janúar, átti slakan leik á Wembley og lenti í miklum vandræðum með Bukayo Saka.
Í fyrra marki Englendinga fór Saka illa með Mudryk áður en hann setti boltann á vinstri löppina og kom með fallega fyrirgjöf sem Harry Kane stýrði í netið.
Steven Gerrard var við störf hjá Channel 4 á leiknum, en hann var afar vonsvikinn með barnalegu mistökin sem Mudryk gerði í fyrra markinu.
„Ef ég horfi á þetta frá sjónarmiði Úkraínu þá er þetta frábært spil hjá Englendingum og hvernig þeir náðu að opna allt á vellinum, en ef ég væri þjálfarinn þá væri ég rosalega vonsvikinn með Mudryk,“ sagði Gerrard.
„Með fullri virðingu þá er hann enn að læra á leikinn en þú veist að þú þarft að halda Saka á hægri löppinni og getur ekki leyft honum að koma inn með boltann á vinstri því hann er með töfrasprota og er gríðarlega nákvæmur,“ sagði Gerrard enn fremur.
Athugasemdir