Keflavík kaupir Pétur Heiðar frá Þór (Staðfest)

Pétur sem er 24 ára hefur komið við sögu í öllum tólf leikjum Þórsara í fyrstu deildinni það sem af er sumri.

Kristján Guðmundsson þjálfari Keflvíkinga þekkir til Péturs en hann þjálfaði leikmanninn hjá Þór á sínum tíma.

,,Ég þekki til hans og hann er mjög góður fótboltamaður. Þetta er mikill liðsstyrkur fyrir okkur," saðgi Kristján við Fótbolta.net í dag.

Sóknarmaðurinn Stefán Örn Arnarson meiddist aftan í læri í vikunni og svo gæti farið að hann leiki ekki meira með Keflvíkingum á tímabilinu. Því ákváðu Keflvíkingar að fá Pétur til liðs við sig.

,,Stefán Örn meiddist á æfingu á þriðjudaginn og það er óvíst hvort að hann geti tekið meira þátt í mótinu með okkur þannig að við urðum að bregðast við," sagði Kristján en hann vill ekki útiloka að fleiri leikmenn muni koma til Keflvíkinga áður en að félagaskiptaglugginn lokar næstkomandi þriðjudag.