Myndband: Akureyrarslagurinn á nýjum velli - Svona verður þetta í kvöld

Spilað er á nýja Greifavellinum á KA-svæðinu. Um fyrsta heimaleik KA á svæðinu er að ræða en ekki er um formlegan vígsluleik að ræða. KA fékk undanþágu frá KSÍ til þess að halda leikinn í kvöld á nýja vellinum, en framkvæmdum er ekki lokið. KA stefnir á að spila alla sína heimaleiki á nýja vellinum á næsta tímabili.

Fótbolti.net kannaði aðstæður á svæðinu í dag og í spilaranum efst má sjá leiðina sem leikmenn fara úr búningsklefum og inn á völlinn. Búningsklefarnir sem verða við nýja völlinn eru ekki tilbúnir og því ganga leikmenn úr búningsklefunum sem eru í KA heimilinu, með fram gamla vellinum, undir nýju stúkuna og þannig inn á nýja völlinn. Það tekur um mínútu að komast úr klefanum og á völlinn og líklegt að hálfleikurinn verði því rétt rúmlega korter.

Á meðfylgjandi myndum má svo sjá hvar stuðningsmenn Þórs verða. Þeir verða í stæðum fyrir aftan syðra markið á vellinum. Stuðningsmenn KA verða í í sætum í stúkunni og í stæðum á langhliðinni beint á móti stúkunni.

Um klukkan 16:00 er stefnt að því að loka Dalsbrautinni við KA heimilið eins og þekkist í kringum N1 mótið. Sama má segja um aðra akreinina í Þingvallastræti við KA svæðið.