Atli Viðar, Ólafur Páll og Heimir Snær í Fjölni (Staðfest)

Þeir koma allir á eins mánaðar lánssamningi til að byrja með en verða væntanlega áfram hjá liðinu nema FH meiðsli setji strik í reikninginn hjá FH og Íslandsmeistararnir þurfi að kalla einhvern þeirra til baka.

Leikmennirnir mættu allir á æfingu hjá liðinu nú á föstudag og eru allir klárir í slaginn í næsta leik liðsins gegn KA 7. júní næstkomandi en Atli Viðar sem hefur verið að jafna sig eftir krossbandsmeiðsli verður þó ekki klár til að leika í byrjunarliði í þeim leik en verður líklega á bekknum.

Auk þeirra þriggja eru þrír leikmenn í liði Fjölnis sem eru uppaldir hjá FH. Það eru þeir Magnús Ingi Einarsson, Sigmundur Pétur Ástþórsson og Tómas Leifsson sem allir voru í byrjunarliði Fjölnis í síðasta leik gegn Stjörnunni.

Ólafur Páll Snorrason er 25 ára gamall hægri kantmaður. Hann lék 16 leiki með FH í Landsbankadeildinni á síðustu leiktíð en náði ekki að skora. Sumarið 2005 skoraði hann þrjú mörk í 12 leikjum og átti fjölda stoðsendinga.

Atli Viðar Björnsson er 27 ára gamall framherji sem hefur verið hjá FH síðan árið 2001. Hann hefur leikið 87 leiki í eild og bikar með liðinu og skorað í þeim 26 mörk.

Heimir Snær er 23 ára gamall og lék tvo leiki með FH í Landsbankadeildinni í fyrra. Hann lék með ÍBV sumarið 2005 og spilaði þá 12 leiki í deild og 3 í bikar. Hann er miðjumaður.