Siggi Raggi: Óspennandi við Færeyjar hversu einangraður maður er

Sigurður Ragnar Eyjólfsson náði frábærum árangri með NSÍ Runavík og gerði liðið að Færeyjameisturum en óvíst er hvort hann haldi áfram. Hann segir helsta ókostinn við að vera í Færeyjum hversu einangraður hann sé utan leikja og æfinga.

„Börnin mín og vinir eru ekki hjá mér og þá einangrast maður þegar það eru ekki æfingar. Ég sakna barnanna minna og áhugamálanna, það er til dæmis enginn golfvöllur í Færeyjum. Þetta var sérstaklega erfitt í þriggja vikna landsleikjahléinu," segir Siggi Raggi í viðtali við Morgunblaðið.

„Ég hef þurft að færa miklar fórnir og ég hef til dæmis bara séð 12 ára strákinn minn í tvær til þrjár vikur á þessu ári. Ég upplifi ekki að ég sé neitt rosalega góður pabbi núna og það gerir þetta erfitt.“

NSÍ vill framlengja samstarfið við Sigga Ragga sem segist ætla að gefa sér góðan tíma í að skoða sín mál og ræða við börnin sín. Hann vill skoða möguleika sína á Íslandi og jafnvel í öðrum löndum.