Mainoo þarf spiltíma til að eiga möguleika á að komast í landsliðshóp Englands.
Butt spilaði tæpa 400 keppnisleiki fyrir Man Utd.
Nicky Butt fyrrum miðjumaður Manchester United fylgist náið með félaginu í dag og tjáir sínar skoðanir á málum þar.
Hann var spurður út í miðjumanninn efnilega Kobbie Mainoo sem gæti verið á förum í janúarglugganum útaf litlum spiltíma. Mainoo er tvítugur og vill vera partur af enska landsliðinu sem fer á HM á næsta ári.
„Ég hef áhyggjur af honum útaf því að hann er stórstjarna. Hann komst í enska landsliðið 18 eða 19 ára gamall og var einn af bestu leikmönnum liðsins á EM. Hann er alvöru heimastrákur, í akademíu Manchester United frá sjö ára aldri. Hann var að byrja þegar ég var ennþá hjá félaginu, hann hefur verið þarna alla ævi," sagði Butt.
„Ég þekki hann mjög vel, ég þekkti hann þegar hann var lítill strákur og ég þekki hann í dag sem mann. Það sem hræðir mig er að ef Kobbie Mainoo væri að spila til dæmis fyrir Crystal Palace, þá myndi Man Utd kaupa hann fyrir 60 eða 70 milljónir punda. Ég er viss um það og ég skil ekkert í því að hann sé ekki að spila fyrir aðalliðið í dag.
„Ég vil samt ekki sitja hérna og segja hvernig þetta ætti að vera, ég þekki ekki söguna á bakvið þetta mál. Eina sem ég veit er að þetta er virkilega hæfileikaríkur fótboltamaður sem getur komist inn í öll byrjunarlið ensku deildarinnar nema kannski hjá fjórum bestu liðunum. Ef hann væri í einhverju öðru liði þá get ég lofað ykkur því að Man Utd myndi kaupa hann fyrir 60 milljónir eða meira í janúarglugganum. Það er vandamálið."
Butt segir að honum finnist þetta mál sorglegt útaf því að Mainoo elskar Man Utd og vill spila fótbolta. Honum líður eins og það sé verið að sóa hæfileikum Mainoo með því að geyma hann á bekknum.
„Hann kom inn af bekknum um daginn manni fleiri gegn Everton og ég var að vonast til að hann myndi skora eða leggja upp en það gekk ekki. Hann er að ganga í gegnum erfiðan kafla en við megum ekki gleyma því að hann er ennþá ungur. Hann þarf hjálp til að ná aftur sama gæðastigi og hann var á, hann þarf hjálp til að fá sama sjálfstraust aftur til baka."
Athugasemdir
