Argentínski framherjinn Giovanni Simeone er að ganga í raðir Borussia Dortmund frá Hellas Verona en þetta kemur fram í ítölskum miðlum í dag.
Dortmund neyddist til að fara aftur á markaðinn og finna nýjan framherja eftir að Sebastien Haller greindist með æxli í eistum fyrr í þessum mánuði.
Hann var keyptur frá Ajax í sumar en mun nú einbeita sér að því að ná bata og er ómögulegt að segja til um hvenær hann snýr aftur á völlinn.
Dortmund þurfti því að hafa hraðar hendur til fá framherja í stað hans en það má gera ráð fyrir því að Simeone gangi í raðir félagsins á næstu dögum.
Fulltrúar frá Dortmund munu ferðast til Ítalíu á fimmtudag til að ganga frá kaupum á Simeone, sem er elsti sonur Diego Simeone, þjálfara Atlético Madríd.
Hann skoraði 17 mörk í Seríu A með Hellas Verona á síðustu leiktíð en Juventus hefur einnig sýnt áhuga á að fá hann í sumar.
Athugasemdir