Lýsingar Ólafs á atvikinu eru allsvakalegar þar sem 8 lögreglubílar, vopnaðir lögregluþjónar, lögregluhundar og þyrla koma við sögu en þegar allt kom til alls kom í ljós að lögreglan hafði farið mannavilt þegar hún handtók þennan geðþekka Íslending.

Við höfðum samband við Ólaf Inga og fengum hann til að segja okkur frá þessari hræðilegu lífsreynslu sinni.

,,Ég var bara á leiðinni á æfingu og tek eftir því fljótlega að löggan var á eftir mér," sagði Ólafur Ingi í samtali við Fótbolta.net.

3 lögreglubílar veita eftirför
,,Ég er svona hálftíma - fjörutíu mínútur að keyra á æfingasvæðið og held bara áfram að keyra og er ekkert að spá sérstaklega í því. Fljótlega voru hinsvegar þrír lögreglubílar á eftir mér og ég var orðinn hálfstressaður á þessum tímapunkti og fer að spá í hvað sé að gerast eiginlega, hvað gangi eiginlega á. Þeir blikkuðu mig ekkert samt eða neitt og ég hugsa, jæja það hlýtur þá að vera einhver æfing í gangi eða eitthvað, þetta getur ekki verið merkilegt."

,,Þeir elta mig áfram og þegar ég er alveg að verða kominn upp á æfingasvæðið þá eru þrír venjulegir lögreglubílar og einn stór ,,riot" bíll á eftir mér. Þegar ég kem að æfingasvæðinu þá er stórt hlið þar og stórt grassvæði til að leggja á. Ég legg þar og þar er félagi minn í bílnum sínum við hliðina á og ég kíki aftur og þar er löggan stopp fyrir aftan hliðið og þá hugsa ég, þetta hefur bara verið æfing eða eitthvað hjá þeim eða eitthvað, mér datt ekkert annað til hugar."

Skyndiárás lögreglunnar
,,Svo bara allt í einu þegar ég lít inn í baksýnisspegilinn þá koma átta lögreglubílar á fleygiferð inn á æfingasvæðið og áður en ég veit af stendur lögreglumaður fyrir utan hurðina hjá mér með riffil og öskrar á mig, upp með hendur, upp með hendur. Áður en ég veit af var búið að rífa mig úr bílnum og setja mig í handjárn og allt að verða vitlaust. Þyrla var komin þarna fyrir ofan og lögregluhundar og allur pakkinn."

,,Þeir leita á mér og leita í bílnum og átta sig þá á að þeir eru búnir að handtaka vitlausan mann. Það var einhver gæji sem átti að hafa beint byssu að einhverjum lögregluþjón og hljóp svo upp í svipaðan bíl og ég er á. Afþví ég er á svipuðum bíl þá héldu þeir að ég væri þessi maður og lögðu svona mikinn kraft í að ná þarna í vitlausa manneskju."

Ólafur Ingi sagði að lögreglumennirnir hafi beðið sig afsökunar en ekki hafi borið mikið á þeirri afsökunarbeiðni. Við spurðum hann hvort hann hafi ekki verið skelkaður.

,,Já auðvitað, þeir voru með byssurnar nánast í andlitinu á mér og auðvitað varð maður hálf skelkaður eftirá. En þetta er búið og gert og ekkert hægt að gera í því."

Enginn óhultur?
22. júlí á síðasta ári skaut lögregla Brasilíumanninn Jean Charles de Menezes átta skotum á Stockwell neðanjarðarlestarstöðinni í Lundúnum eftir að hafa veitt honum eftirför. Hann var hinsvegar saklaus og hafði ekkert unnið sér til saka heldur gerði lögreglan mistök. Ólafur Ingi óttaðist að illa færi fyrir sér líka.

,,Ég hló nú aðeins að þessu en þetta er náttúrulega alvarlegt mál eins og maður hefur séð í sjónvarpinu með manninn frá Brasilíu sem var skotinn. En ég held að maður verði bara að hlægja að þessu og líta á björtu hliðarnar á þessu. Þarna var mörgþúsundum punda eytt í að ná í einhvern vitlausan Íslending sem hafði ekki hugmynd um hvað var að gerast. Og kölluð út þyrla og allur pakkinn. Þetta er lífsreynsla sem ég myndi ekki vilja lenda í aftur."

,,Sem betur fer vorum við bara tveir sem áttum að mæta á æfingu þennan dag, því það áttu bara meiddir menn að mæta. En hann var alveg í sjokki kallgreyjið [liðsfélagi hans sem varð vitni að öllu saman], hvað var í gangi. Svo kom sjúkraþjálfarinn á eftir okkur og hann mætir þarna og það fyrsta sem hann sér er mig í járnum og þyrlu og lögregluhunda og tugi lögreglumanna. Hann náttúrulega hugsaði með sér hvað var eiginlega í gangi þarna."

Á góðum batavegi
Ólafur Ingi gekk í raðir Brentford í sumar frá stórliði Arsenal eftir að samningur hans við þá rann út. Hann náði hinsvegar aðeins að leika tvo leiki með Brentford áður en hann lenti í að slíta krossbönd í hné og hefur ekkert spilað fótbolta síðan. Það styttist hinsvegar í það.

,,Ég er byrjaður að æfa og allur að komast í gang og ég á ekki von á að spila á tímabilinu. Ég þarf að koma mér í leikform en þetta veltur líka á hvort við náum í umspil eða ekki. Vonandi förum við bara beint upp en þá þarf ég ekki að spila neitt."

,,Það verður bara að koma í ljós. Það er búið að vera erfitt að hafa bara spilað hérna tvo leiki og var bara búinn. Það tók á að geta ekkert gert og geta ekki verið með. En maður er kátur að vera kominn á ról aftur og vonandi á þetta eftir að ganga ágætlega."