Ítalía: Atalanta skoraði sjö gegn Lecce

Atalanta hefur stimplað sig inn sem eitt af skemmtilegustu knattspyrnuliðum heims og hefur gullfallegur sóknarleikur liðsins vakið mikla athygli víða um Evrópu.

Í dag heimsóttu lærisveinar Gian Piero Gasperini fallbaráttulið Lecce og úr varð mikil veisla.

Gestirnir frá Bergamó komust í tveggja marka forystu í fyrri hálfleik eftir tvær hornspyrnur. Giulio Donati, varnarmaður Lecce, var einn og óvaldaður í fyrri spyrnunni en skallaði knöttinn engu að síður í eigið net. Duvan Zapata stangaði knöttinn svo í netið fimm mínútum síðar.

Riccardo Saponara sneri stöðunni við fyrir heimamenn. Hann skoraði fyrst glæsilegt mark og lagði svo upp jöfnunarmarkið fyrir Donati. Staðan var því 2-2 í leikhlé.

Gestirnir tóku gjörsamlega öll völd á vellinum í síðari hálfleik og röðuðu inn mörkunum. Josip Ilicic skoraði og lagði upp, Zapata fullkomnaði þrennuna sína og varamennirnir Luis Muriel og Ruslan Malinovskyi komust einnig á blað.

Þetta var þriðji sigur Atalanta í röð í ítölsku deildinni og er liðið í fjórða sæti sem stendur, sex stigum á undan Roma sem heimsækir Cagliari síðar í dag.