Taylor dæmdi úrslitaleik Evrópudeildarinnar í Búdapest í gær er Sevilla varð meistari í sjöunda sinn.

Jose Mourinho, þjálfari Roma og stuðningsmenn félagsins voru ósáttir með dómgæsluna í leiknum. Mourinho beið í bílastæðahúsi vallarins og hraunaði þar yfir dómarateymið og þá voru stuðningsmenn Roma mættir á flugvöllinn þar sem þeir lýstu óánægju sinni með Taylor.

Þeir gengu langt yfir skrefið en drykkjarföngum og stólum var kastað í átt að Taylor og fjölskyldu hans áður en flugvallarstarfsmenn komu þeim í skjól.

Dómarasambandið á Englandi er í áfalli yfir þessari hegðun og hefur það sent frá sér yfirlýsingu.

„Við erum í áfalli yfir óréttlætanlegri og hryllilegri misþyrmingu sem var beint að Anthony og fjölskyldu hans er hann reyndi að komast heim eftir að hafa dæmt úrslitaleik Evrópudeildarinnar. Við munum halda áfram að sýna Anthony og fjölskyldu hans allan okkar stuðning,“ segir í yfirlýsingu dómarasambandsins.

Sjá einnig:
Skammarleg hegðun stuðningsmanna Roma á flugvellinum í Búdapest