Taylor dæmdi úrslitaleik Roma og Sevilla í Evrópudeildinni í gær.

Jose Mourinho, þjálfari Roma, beið eftir dómarateyminu eftir leikinn í gær og hundskammaði það fyrir dómgæsluna í leiknum. Taldi Mourinho að Erik Lamela, leikmaður Sevilla, hafi átt að líta rauða spjaldið fyrir olnbogaskot á Roger Ibanez og þá fékk liðið ekki vítaspyrnu er Loic Bade handlék boltann í teignum undir lok leiksins.

Í vítaspyrnukeppninni fékk Gonzalo Montiel að endurtaka sigurspyrnuna. Rui Patricio, markvörður Roma, var kominn af línunni í fyrri spyrnunni er hann varði hana og fékk Montiel að taka aðra spyrnu og skoraði hann úr henni og tryggði Sevilla sigurinn.

Er Taylor var að yfirgefa Búdapest í dag voru stuðningsmenn Roma á svæðinu og köstuðu hlutum í hann og fjölskyldu hans á meðan öryggisverðir fylgdu þeim í skjól. Dætur Taylor grétu og einn stuðningsmaðurinn kastaði flösku sem hæfði eiginkonu hans en hægt er að sjá myndband af þessu hér fyrir neðan.