Þýskaland: Ísak lék klukkutíma í jafntefli - Eftirminnilegur dagur hjá El Mala-fjölskyldunni

Ísak Bergmann Jóhannesson var í byrjunarliði Köln sem gerði 1-1 jafntefli við Union Berlín í þýsku deildinni í dag, en þetta reyndist heldur betur eftirminnilegur dagur fyrir El Mala-fjölskylduna.

Skagamaðurinn er orðinn lykilmaður hjá Köln og var því að venju á sínum stað á miðjunni, en hans menn lentu undir snemma leiks þegar Janik Haberer kom Union yfir.

Varnarleikur Köln var heldur slakur í markinu, en leikmenn Union fengu að athafna sig nánast óáreittir við vítateiginn og inni í honum áður en Tim Skarke náði að pota boltanum framhjá markverði Kölnar á Haberer, sem átti auðvelt með að skora í autt markið.

Ísak fór af velli þegar hálftími var eftir, en á 72. mínútu gerði Köln athyglisverða skiptingu þegar hinn 21 árs gamli Malek El Mala kom inn á.

Malek er eldri bróðir Said El Mala, sem hefur verið einn besti leikmaður Kölnar á tímabilinu og vann sér nýlega sæti í þýska landsliðinu. Þetta var hins vegar frumraun Malek með aðalliði Kölnar og átti hann heldur betur eftir að setja mark sitt á leikinn.

Aðeins sjö mínútum eftir innkomuna skoraði hann jöfnunarmarkið. Yngri bróðirinn sendi þá boltann inn í teiginn þar sem Alessio Castro-Montes stýrði honum í átt að fjærstönginni. Þar var Malek mættur á réttum stað og tryggði Köln dýrmætt stig.

Ógleymanleg stund fyrir El Mala-bræðurna og fjölskylduna, en Köln situr í 13. sæti deildarinnar með níu stig eftir leikinn á meðan Union Berlín er í 16. sæti með sjö stig.