Búið að loka glugganum - Mateta áfram í Palace eftir mikið fár

Þó glugginn sé lokaður eru einhver skipti sem eiga eftir að detta í gegn, pappírum sem var skilað fyrir gluggalok en skipti sem hafa ekki verið staðfest.

Eitt stærsta mál dagsins snérist um franska sóknarmanninn Jean-Philippe Mateta hjá Crystal Palace. Hann vill yfirgefa Palace og var á leið til AC Milan áður en vandamál komu upp í læknisskoðun í gær.

Mateta fór í frekari skoðun í dag vegna hnémeiðsla og eftir að hafa fallið á henni þá hætti Milan við kaupin. Mateta verður því hjá Palace út tímabilið.

Palace var búið að ná samkomulagi við Wolves um kaup á Jörgen Strand Larsen til að fylla skarð Mateta og ákvað að vinna í að klára þau kaup þrátt fyrir að Mateta hafi fallið á læknisskoðun. Strand Larsen verður kynntur hjá Palace á næstu mínútum.

Belgíski fótboltablaðamaðurinn Sacha Tavolieri segir að hinn stæðilegi Mateta þurfi að fara í aðgerð á hné og verði þá frá keppni í um 3-4 mánuði en þetta hefur ekki verið staðfest.