„Mér þótti mjög vænt um það (að ljúka ferlinum í bláu Framtreyjunni), virkilega vel tekið á móti mér aftur og maður var pínulítið að loka hringnum með því að klára þetta þarna."

„Þetta var mjög skemmtilegt, nýja aðstaðan frábær. Þegar ég kom 2008 var mér lofað að við myndum byrja að spila á þessum velli 2011. Svo kom smá efnahagshrun og allskonar þannig það gekk ekki eftir. Það var mjög gaman að fá loksins að upplifa þetta, frábær aðstaða og liðið mjög skemmtilegt."

„Við vorum oft á tíðum að spila skemmtilegasta fótboltann fyrir áhorfendur, ég hefði kannski viljað loka aðeins meira til baka en það er mjög gaman að vera hluti af þessu. Framtíðin er held ég björt fyrir Framara."

Á tímabilinu skoraði Fram 53 mörk og fékk á sig 63 mörk. Sem leikmaður, er skemmtilegra að halda hreinu og vinna 1-0 eða taka þátt í miklum markaleikjum?

„Ég vil alltaf bara vinna, það er númer 1,2 og 3. Það fer rosalega eftir því hvernig leikirnir þróast hvað er skemmtilegt. Eftir á finnst mér alltaf skemmtilegast að skora sigurmarkið á 93. mínútu. Ég tala nú ekki um ef þú lendir undir í leikjum og kemur til baka. Í sumum leikjum í sumar var ekkert rosalega gaman að vera fá þessu mörk á okkur. Á móti kom þá vorum við að skora fullt af mörkum sjálfir. Það skemmtilegasta í þessu er að skora mörk og vinna leiki."

Hvað tekur við? „Ef ég bara vissi það, ég veit það ekki alveg. Ég er rétt að ná að melta hlutina núna, er að skoða framhaldið hvort það sé eitthvað líf eftir fótboltann. Ég þarf bara að sjá til."

„Líkamlega er ég alveg í ágætis standi. Tímabilið var reyndar langt, farið að verkja í ýmsa ökkla og allskonar en mér fannst hausinn ekki alveg vera í þessu lengur. Þetta var hætt að vera jafngaman og þetta á að vera. Þetta verður að vera gaman. Mér fannst hausinn vera svolítið búinn."

Almarr, sem er 34 ára, spilaði oftast sem miðjumaður á sínum ferli. Hann lék með KA, Fram, KR, Fjölni og Val á ferlinum, spilaði sína fyrstu meistaraflokksleiki árið 2005 með KA, fór til Fram um mitt árið 2008 og var þar út tímabilið 2013. Í kjölfarið fór hann í KR þar sem hann var í tvö tímabil áður en hann sneri aftur norður.

Almarr tók þá tvö tímabil með KA, fór í Fjölni 2018 og tók svo aftur tvö tímabil hjá KA. Fyrir tímabilið 2021 samdi hann við Val og hann skipti svo í Fram núna um mitt mót 2022.

Eins og kemur fram lék Almarr lengi með KA á sínum ferli. Liðið endaði í 2. sæti deildarinnar í ár sem er besti árangur liðsins í 33 ár.

„Ég er með mjög sterkar taugar norður og ég samgleðst þeim alveg innilega. Ég spilaði með langflestum af þessum strákum, virkilega ánægður."

„Það er gaman að Haddi sé kominn við stjórnvölinn, hann er góður vinur minn. Þetta er í þriðja skiptið sem liðið fer í Evrópukeppni og besti árangurinn fyrir utan titilinn 1989. Ég gæti ekki verið mikið ánægðari með þá."

„Að sama skapi er framtíðin bjartari hjá Frömurum en hún hefur verið undanfarin ár, ég vona innilega að liðið nái að halda sér uppi í efstu deild og klifri upp töfluna næstu tímabil."

Af hverju ákvað Almarr að fara í Fram á miðju tímabili?

„Eins og tímabilið var að þróast hjá Val var ég ekki að fá mínútur. Ég vissi alltaf að það yrði erfitt að vinna mér inn sæti í Valsliðinu, feiknasterkt lið og það var ekki gert í illu við einn eða neinn. Heimir var búinn að taka mig úr róteringunni þannig séð, ég var að fá einhverjar mínútur en ekki jafnmikið og í fyrra."

„Framarar bönkuðu í mig í sirka fimmta skiptið á síðustu tveimur árum og á endanum var það meira spennandi að vera spila þar. Mig langaði að safna aðeins fleiri leikjum, þegar ég skrifaði undir ætlaði ég að taka næst ár líka en lét Framara samt vita að þetta væri alveg möguleiki. Það heillaði aðeins að klára þetta í Fram og fá leiki," sagði Almarr.

Í viðtalinu, sem má sjá í spilaranum efst í fréttinni, ræðir Almarr nánar um tímabilið hjá Fram.

Almarr varð í tvígang bikarmeistari á sínum ferli og fór á lokamót U21 landsliða árið 2011. Hann lék alls 20 leiki með yngri landsliðum Íslands. Á ferlinum skoraði hann 62 mörk í 386 leikjum í deild og bikar.