Ed Still rekinn frá Watford (Staðfest)

Still var ráðinn í febrúar á tveggja og hálfs árs samningi sem átti að gilda til sumarsins 2028. Honum tókst þó ekki að gera góða hluti í Championship deildinni eftir að hafa tekið við stjórnartaumunum af Javi Gracia.

Þegar Still tók við var Watford í ellefta sæti Championship deildarinnar, aðeins þremur stigum frá umspilssæti, en liðið er aðeins búið að vinna þrjá af fimmtán deildarleikjum síðan þá.

Watford endaði í 16. sæti eftir slæmt gengi undir leiðsögn Still. Liðið endaði heilum 16 stigum frá umspilsbaráttunni og aðeins 10 stigum fyrir ofan fallsæti.

Lokaleikur tímabilsins var stórt tap á heimavelli gegn meisturunum í Coventry og kemur brottrekstur Ed Still, sem er aðeins 35 ára gamall, ekki á óvart.

Watford hefur nú leitina að fimmtánda aðalþjálfara félagsins síðan í september 2019. Fjórtán þjálfarar hafa því verið ráðnir inn á tæpum sjö árum, án þess að telja bráðabirgðaþjálfarana.

TENGT EFNI02.05.26 - 09:00

Hefur engan áhuga á að taka við Watford - „Ekki séns"