Dale Stephens lék í 8 ár hjá Brighton en hann gekk til liðs við Burnley fyrir tímabilið 2020/21 og skrifaði undir tveggja ára samning.
Samningur hans við félagið rann út í sumar og ákvað félagið að endursemja ekki við hann. Hann lék aðeins 10 leiki fyrir félagið á þessum tveimur árum.
Hann var kannski ekki hissa á því að fá ekki nýjan samning en vinnubrögð Burnley komu honum í opna skjöldu.
„Ég komst að þessu, eins undarlegt og það er, á Twitter að ég væri ekki að fá nýjan samning. Ég vissi það nú samt alveg áður en samningurinn rann út," sagði Stephens.
„Burnley gaf þetta út í fjölmiðlum og ég sá þetta svo bara á Twitter að ég og nokkrir aðrir hafi verið leystir undan samningi á sama tíma, svo það voru ekki miklar samræður um nýjan samning."
Stephens æfir nú með sínum fyrrum félögum í Brighton til að halda sér í formi á meðan hann leitar sér af nýjum vinnustað.