Breiðablik er komið áfram í 16. liða úrslit Mjólkurbikarsins eftir góðan 1-6 sgur á liði Kormáki/Hvatar á Sauðárkróksvelli í dag.
„Bara mikilvægt að ná í sigurinn, komast áfram í næstu umferð og bara professional að klára leikinn." Sagði Kristófer Ingi Kristinsson spurður um fyrstu viðbrögð eftir leik.
Lestu um leikinn: Kormákur/Hvöt 1 - 6 Breiðablik
Kristófer Ingi setti tvö mörk í dag, hvernig var tilfinningin?
„Það er bara flott að ná mörkum, en númer eitt, tvö og þrjú að ná sigrinum þannig ég er bara mjög sáttur í dag."
„Við náttúrlega vissum að þeir myndu vera þéttir og við þyrftum að vera þolinmóðir. Mikilvægt að halda tempói og bara gera sömu hluti aftur og það skilaði sér með nokkrum mörkum í dag."
„Þeir eru auðvitað með fullt af flinkum leikmönnum þarna og við vissum alveg að ef við værum ekki að fókusa að þá gætu þeir alveg skaðað okkur. Þannig við þurftum að halda haus og gera okkar. Mér finnst þetta bara professional hjá okkur og fínt að klára þetta með sigri."
Samningurinn hjá Kristófer Inga er að renna út eftir tímabilið er hann í einhverjum viðræðum við Breiðablik eins og staðan er núna?
„Eins og staðan er núna þá er ég bara að fókusa á tímabilið og hef ekkert heyrt eitt né neitt þannig ég fókusa bara á að spila."
„Markmiðið hjá liðinu er að við viljum stefna á að vinna allt. Metnaðurinn er þar og mér finnst við vera með frábært lið sem að getur klárlega gert það. Ég sjálfur auðvitað vill leggja mig fram í það, kannski aðeins meira en ég hef gert upp á síðkastið. Númer eitt, tvö og þrjú að halda mér heilum og skila mínum mörkum."
Sjáðu viðtalið í heild hér að ofan
