Tíu yfir 30 sem voru frábærir í fyrstu umferð

Sölvi Geir Ottesen (37) - Víkingur: Fyrstan ber að nefna Sölva, leikmann umferðarinnar. Stríðsmaðurinn í Fossvogi skoraði sigurmarkið gegn Keflavík og var hrikalega öflugur í öftustu línu.

Óskar Örn Hauksson (36) - KR: Eins og gott rauðvín. Ótrúlegur leikmaður sem braut ísinn í sigri KR gegn Breiðabliki í stórleik umferðarinnar.

Matthías Vilhjálmsson (34) - FH: Stimplar sig glæsilega aftur inn í íslenska boltann og skoraði annað mark FH í sigri gegn Fylki í Árbænum. Velkominn heim!

Brynjar Hlöðversson (32) - Leiknir: Þessi mikli keppnismaður var frábær í vörn nýliða Leiknis í markalausu jafntefli gegn Stjörnunni. Fékk dauðafæri til að kóróna frammistöðu sína með sigurmarki en nýtti það ekki.

Arnór Sveinn Aðalsteinsson (35) - KR: Geggjaður í vörn KR gegn Breiðabliki. Rúnar Kristinsson segir hann besta miðvörð deildarinnar... við heyrum engin mótmæli.

Þórður Ingason (33) - Víkingur: Ingvar Jóns er á meiðslalistanum en Þórður steig frábærlega inn gegn Keflavík og átti flotta frammistöðu. Hélt markinu hreinu.

Steven Lennon (33) - FH: Sóknarmaður FH-inga sýnir gæði sín ár eftir ár. Kom FH yfir af vítapunktinum gegn Fylki.

Pálmi Rafn Pálmason (36) - KR: Afskaplega öflugur á miðju KR í sigrinum gegn Breiðabliki.

Steinþór Már Auðunsson (31) - KA: Stubbur spilaði sinn fyrsta leik í efstu deild vegna meiðsla Jajalo. Hélt markinu hreinu og varði dauðafæri sem HK fékk. 0-0 enduðu leikar og Stubbur getur gengið sáttur frá borði.

Kennie Chopart (30) - KR: Skoraði af löngu færi gegn Breiðabliki. KR-ingar eiga fjóra leikmenn á þessum lista. Gamlir en rosalega góðir!