Freyr þjálfari mánaðarins - Sjáðu Alfreð færa honum fréttirnar

Freyr Alexandersson var valinn þjálfari september- og októbermánaðar í norsku úrvalsdeildinni. Rosenborg vann sex af sjö deildarleikjum sínum á tímabilinu og fékk 19 stig af 21 mögulegu.

Verðlaunin eru veitt fyrir þessa tvo mánuði vegna þriggja vikna landsleikjahlésins sem byrjaði í september og lauk í byrjun október. Verðlaunin eru valin af dómnefnd TV2 og norsks toppfótbolta.

Þá var Amin Chiakha, framherji Rosenborg, valinn leikmaður mánaðanna tveggja en hann skoraði átta mörk í leikjunum sjö.

Alfreð Finnbogason, yfirmaður fótboltamála hjá Rosenborg, færði Frey fréttirnar í klefa Rosenborg eftir sigur liðsins gegn Start á laugardaginn.

Alfreð sagði þó að babb hefði komið í bátinn þar sem verðlaunin væru föst í póstinum en Freyr fagnaði engu að síður innilega.

Rosenborg er í 3. sæti deildarinnar og Evrópusætið innan seilingar. Freyr hefur náð að snúa afleitu gengi við en hann tók við liðinu í 15. sæti deildarinnar.

Hann var einnig valinn þjálfari júlímánaðar, Freyr hefur því verið þjálfari mánaðarins í þrjá mánuði af fjórum sem hann hefur verið við stjórnvölinn í Lerkendal.