Besta deildin: Sautján ára með sigurmarkið í endurkomu Blika

Breiðablik vann 2-1 endurkomusigur á ÍA í 13. umferð Bestu deildar karla á ELKEM-vellinum á Akranesi í dag.

Skagamenn voru hættulegri aðilinn í fyrri hálfleik. Steinar Þorsteinsson átti fína tilraun í stöngina áður en Ómar Björn Stefánsson komst í dauðafæri, en Blikar náðu að bjarga á síðustu stundu.

Markið lá í loftinu og það kom aðeins nokkrum mínútum síðar. Ómar Björn átti þá frábæran undirbúning og Steinar þakkaði fyrir sig með því að setja boltann í netið.

Hinn 15 ára gamli Arnar Bjarki Gunnleifsson var hársbreidd frá því að jafna metin þegar hann sneri Erik Tobias Sandberg af sér, en skot hans fór í stöngina. Arnar hefur verið heitur með Blikum og frammistaða hans hefur nú þegar tryggt honum samning hjá danska stórveldinu Bröndby.

Blikar fóru marki undir inn í hálfleikinn en jöfnuðu þegar tæpur hálftími var til leiksloka. Arnar Bjarki las þá frábærlega sendingu til baka, náði til boltans og kom honum á Ágúst Orra Þorsteinsson, sem skoraði.

Þegar um tíu mínútur voru eftir kom Þór Andersen Willumsson inn á sem varamaður hjá Blikum og hann þurfti ekki langan tíma til að láta til sín taka.

Dagur Örn Fjeldsted átti laglegan bolta á Þór, sem stangaði boltann í netið í sinni fyrstu snertingu og tryggði Blikum sigurinn. Þetta var fyrsta mark Þórs í deildinni og það í aðeins öðrum deildarleik hans með Blikum.

Það er nóg af hæfileikum í þeirri fjölskyldu, en Þór er yngri bróðir landsliðsmannanna Willums Þórs og Brynjólfs Andersen. Faðir þeirra er auðvitað fyrrum þjálfarinn og leikmaðurinn Willum Þór Þórsson.

Skagamenn fengu tækifæri til að næla í stig. Viktor Jónsson komst í dauðafæri en setti boltann beint á Anton Ara Einarsson í markinu og Guðmundur Þórarinsson átti þá hörkuskot rétt yfir.

Jöfnunarmarkið kom hins vegar aldrei og Blikar fögnuðu sætum útisigri. Þeir eru í 4. sæti með 22 stig en ÍA er í 8. sæti með 15 stig. Skagamenn hafa nú tapað þremur leikjum í röð.