Voru ekki skýr merki um framþróun liðsins

Samkvæmt heimildum BBC ákvað stjórn Manchester United að láta Rúben Amorim taka pokann sinn í ljósi þess að ekki væru skýr merki um að liðið væri í framþróun undir hans stjórn.

Manchester United er í sjötta sæti deildarinnar eftir að hafa endað sögulega lágt á síðasta tímabili, eða í fimmtánda sæti. Í yfirlýsingu Manchester United er sagt að þetta sé rétti tímapunkturinn fyrir breytingar.

Ummæli Amorim við fjölmiðla í gær vöktu mikla athygli en þar sendi hann stjórninni pillu og sagði að afskipti hennar af liðinu væru of mikil. Í morgun var svo tilkynnt að portúgalski stjórinn hefði verið rekinn.

„Þegar þú segir svona hluti á fréttamannafundi þá ertu klárlega að reyna að stuða. Þetta getur farið í hvora áttina sem er. Kannski færðu stuðning eða þetta endar illa," segir Gary O'Neil, sérfræðingur BBC.