Mbappe segir fréttir af ósætti við þjálfarateymið blásnar upp

Kylian Mbappe, sóknarmaður Real Madrid, er í kapphlaupi við tímann til að vera klár í El Clasico slaginn gegn Barcelona sem fram fer á sunnudag.

Mbappe hefur verið til umfjöllunar í spænskum fjölmiðlum þar sem sagt er að hann hafi átt í deilum við menn í þjálfarateyminu, aðstoðarmenn Alvaro Arbeloa. Sagt er að hann hafi lent í háværu rifrildi á æfingasvæðinu.

Þá hefur Mbappe fengið gagnrýni fyrir að fara í frí með kærustu sinni í meiðslunum en þau tvö voru mynduð njóta lífsins á snekkju á meðan liðsfélagar hans voru að búa sig undir leikinn gegn Börsungum.

Það stefnir í að Real Madrid fari titlalaust í gegnum tímabilið en liðinu hefur mistekist að vinna stóran titil síðan Mbappe kom til félagsins. Margir stuðningsmenn liðsins eru ósáttir við hugarfar hans og hátt í 300 þúsund manns hafa skrifað undir undirskriftarlista þar sem kallað er eftir því að hann yfirgefi félagið.